PR ‘ပီအာရ်စနစ်’ ဆိုပြီး အသံတွေ ထွက်လာရာကနေ နည်းနည်းအေးသွားပြီး ဟော့့ အခုတော့ လွှတ်တော်အထိ ရောက်လာပါပြီ။ တကျော့ပြန်ဖြစ်လာတာပါ။ ဘာလို့ပါလဲ။ အတွက်အချက်နဲ့ အကွက်ချနေတာဖြစ်ပါတယ်။
PR ‘ပီအာရ်’ အတိုကောက်က နိုင်ငံရေးမှာ အနည်းဆုံး (၃) မျိုးရှိပါတယ်။
၁။ Proportional representation (PR) အချိုးကျကိုယ်စားလှယ်ရတဲ့စနစ်၊
၂။ Permanent Resident (PR) မြန်မာနိုင်ငံထဲမှာ အမြဲတမ်းနေထိုင်ခွင့်ရှိတဲ့ နိုင်ငံခြားသားများနဲ့ နိုင်ငံခြားနေ မြန်မာပြည်ဖွါးတွေအတွက် ထုတ်ပေးမယ်ဆိုတဲ့ လူဝင်မှုကြီးကြပ်ရေးစနစ် နဲ့
၃။ Public relations (PR) လူထုဆက်ဆံရေးဆိုတာ အများပြည်သူတွေကို အုပ်ချုပ်နေတဲ့ အစိုးရကနေ သူတို့က လူထုအတွက် ဘယ်လိုတွေကောင်းအောင် လုပ်နေပါတယ် ဆိုတာကို ကြော်ညာဆန်ဆန်လုပ်တဲ့အလုပ်မျိုးဖြစ်တယ်။ စစ်တပ်ကနေလဲ ဒီအလုပ်မျိုးလုပ်ပါသေးတယ်။
အချိုးကျကိုယ်စားလှယ်ရတဲ့ ‘ပီအာ’ စနစ်ဟာ ကနေ့မြန်မာပြည်မှာ လုံးဝသင့်တော်ခြင်း မရှိကြောင်း အချက် (၃) ချက်နဲ့ တင်ပြပါရစေ။
၁။ PR အချိုးကျကိုယ်စားလှယ်ရတဲ့စနစ်ဟာ ရုပ်ထွေးတဲ့ စနစ်တခုဖြစ်ပါတယ်။ မဲပေးခွင့်ရှိသူတွေကနေ တယောက်တမဲနဲ့ မဲပေးရွေးချယ်တဲ့ ကိုယ်စားလှယ်စနစ်မဟုတ်ဘဲ မဲပုံးတိုင်းကနေရတဲ့ မဲစုစုပေါင်းကို ပုံသေနည်းနဲ့တွက်ပြီး လွှတ်တော်ထဲ တက်ဘို့ ကိုယ်စားလှယ် ဘယ်နှစ်ယောက်ရတယ်ဆိုတဲ့စနစ် ဖြစ်ပါတယ်။ ဒါအကြမ်းဖျဉ်းပြောတာပါ။ အများကြီး ရှိပါအုံးမယ်။ မဲပေးနည်း + လူရွေးနည်းဟာ ရှုတ်ထွေးလွန်းတာကြောင့် မြန်မာပြည်ရဲ့ ကနေ့ မဲပေးပိုင်ခွင့်ရှိသူတွေကို စိတ်ရှုတ်ထွေးစေနိုင်ပါတယ်။
မြန်မာနိုင်ငံမှာ မဲပေးနည်း (၃) နည်းကို ကျင့်သုံးခဲ့ပြီးပြီလို့ ယေဘုယျ ဆိုနိုင်ပါတယ်။
(၁) ဖဆပလခေတ်မှာတော့ အရောင်တွေနဲ့ထားတဲ့မဲပုံးတွေထဲကို ကိုယ့်မဲ့ပြား ထည့်ရတဲ့စနစ် သုံးခဲ့တယ်။
(၂) အဖြူရောင်မဲပုံး ဒါမှမဟုတ် အမဲရောင်မဲပုံးထဲ ကိုယ်ကြိုက်ရာ မဲပြား (မဲစာရွက်) ထည့်ရတဲ့စနစ်ကို ‘မဆလ’ ခေတ်မှာ သုံးခဲ့တယ်။
(၃) မဲစာရွက်ပေါ်က ကိုယ်ကြိုက်တဲ့လူရဲ့ ဘေးမှာ ကြက်ခြေခတ်ရတဲ့စနစ်ကို ၁၉၉ဝ နဲ့ ၂ဝ၁ဝ-၁၂ မှာ လုပ်ခဲ့တယ်။
အဲလို ခပ်ရှင်းရှင်း မဲပေးနည်းတွေမှာတောင်မှ မဲမပေးတတ်သူတွေမနည်း၊ ပယ်မဲတွေ အတော်အသင့်ရှိပြီး၊ မဲခိုးဘို့လဲ လွယ်ကူစေခဲ့ပါတယ်။ ပီအာလိုရှုပ်ထွေးတာကို နိုင်ငံရေးထဲ အနှစ် ၂ဝ လောက် လုပ်နေသူတွေတောင်မှ ခေါင်းစားပါတယ်။ လူထုကို စိတ်ညစ်အောင် မလုပ်သင့်ကြပါ။ ရိုးရိုးကျင့် မြင့်မြင့်ကြံကြစေချင်ပါတယ်။
၂။ ကမ္ဘာမှာ ‘ပီအာရ်စနစ်’ ကျင့်သုံးတဲ့နိုင်ငံတွေ မနည်းပါ။ စုစုပေါင်း (၈၆) နိုင်ငံ ရှိပါတယ်။ ကမ္ဘာမှာ ပီအာတွေများလို့ ဒို့မြန်မာပြည်မှာလဲ ကျင့်သုံးသင့်တယ်လို့ ဆိုချင်သူများရှိပါသလား။
ဥပမာတခုပေးပါရစေ။ ‘အာဏာရှင်စနစ်မှ ဒီမိုကရေစီသို့’ ခေါ်တဲ့ ‘ဂျင်း-ရှပ်’ စာအုပ်ကို ၁၉၉၃ မှာ မြန်မာဘာသာပြန်ပြီး ထုတ်ဝေခဲ့ပါတယ်။ အဲဒီအထဲမှာ -
• လွတ်လပ်သော နိုင်ငံများ = ၁၉၈၃ တုံးက ၅၅ နိုင်ငံရှိရာကနေ၊ ၁၉၉၃ မှာ ၇၅ နိုင်ငံ၊
• တစိတ်တဒေသ လွတ်လပ်သောနိုင်ငံများ = ၁၉၈၃ တုံးက ၇၆ နိုင်ငံရှိရာကနေ၊ ၁၉၉၃ မှာ ၇၃ နိုင်ငံ၊
• မလွတ်လပ်သော နိုင်ငံများ = ၁၉၈၃ တုံးက ၆၄ နိုင်ငံရှိရာကနေ၊ ၁၉၉၃ မှာ ၃၈ နိုင်ငံ။
မြန်မာနိုင်ငံဟာ ၁၉၈၃ တုံးက တစိတ်တဒေသ လွတ်လပ်တဲ့ နိုင်ငံများစာရင်းကနေ ၁၉၉၃ မှာ မလွတ်လပ်တဲ့နိုင်ငံများစာရင်းထဲ ခုန်ဆင်းခဲ့ပါတယ်။ ဒီမိုကရေစီနိုင်ငံတွေ အလွန်မတန် များပေမဲ့ မြန်မာပြည်ဟာ ၁၉၆၂ ကနေ ၁၉၈၈ အထိ တပါတီစနစ်နဲ့ နေခဲ့တယ်။ ဒိနောက်မှာ အရှေ့ဥရောပနဲ့ အရှေ့တောင် အာရှနိုင်ငံတွေမှာ အာဏာရှင်တွေအောက်ကနေ လွတ်မြောက်ပြီး ဒီမိုကရေစီနိုင်ငံတွေ ပိုများလာပြန်တော့လဲ ၁၉၈၈ ကနေ ၂ဝ၁ဝ အထိ စစ်အာဏာရှင်စနစ်နဲ့သာ နေခဲ့ပါတယ်။ ‘ကမ္ဘာမှာ အများစုလုပ်တိုင်း မြန်မာနိုင်ငံက မလိုက်ခဲ့တာဟာ သမိုင်းတွင်ပါတယ်။’ အဲလို ကောင်းတာကိုတော့ သူများတွေလုပ်လို့ လိုက်မလုပ်ဘဲ၊ အခုဟာကြမှ အများလုပ်တာကိုလုပ်ချင်တာဟာ ရိုးသားမှုမရှိပါ။
၃။ ၂ဝ၁ဝ တုံးက ဘာလို့ ‘ပီအာ’ ကို မလိုခြင်ခဲ့ကြပါသလဲ။ ၂ဝ၁၂ ပြီးမှဆိုတော့ NLD ကို တန်းညှိဘို့ မဟုတ်ပါဘူးလို့ ခိုင်မာတဲ့ ငြင်းဆိုချက် ရှိမယ်မထင်ပါ။ ပြည်ခိုင်ဖြိုးကရော ၂ဝ၁ဝ မတိုင်ခင်က ဘာလို့သတိမရပါသလဲ။ ‘ပီအာ’ သံထွက်ကာစမှာ ပြည်ခိုင်ဖြိုးပါတီက ဟိုလိုလို သည်လိုလို နေခဲ့တာ မှတ်မိပါတယ်။ ရေဒီယိုတခုကမေးတဲ့အခါ ကျွန်တော် ဖြေခဲ့ဘူးပါတယ်။ ‘တကယ်လို့ ပြည်ခိုင်ဖြိုးပါတီကသာ ‘ပီအာ’ ကိုလက်ခံမယ်ဆိုရင် ထူးခြားမှု ဖြစ်မယ်’ လို့။ အခု အမျိုးသားလွှတ်တော်ထဲထိ ရောက်လာပါပြီ။
ခုတလောမှာ ရွေးကောက်ပွဲကော်မရှင်ကနေ အသံတွေ၊ စာတွေ ခပ်သွက်သွက် ထွက်လာနေတာ သတိပြုကြမှာပါ။ လာမဲ့ရွေးကောက်ပွဲတွေမှာ ၂ဝ၁ဝ တုံးကလို ‘ကြိုတင်မဲ’ မလုပ်တော့မှာကို အာမခံနိုင်တယ်။ ဒါပေမဲ့ နည်းသစ်တွေလာမယ်ဆိုတာလဲ ကျိန်းသေတယ်။ အခု တစတစနဲ့ ပေါ်လွင်လာနေပါပြီ။
NLD ကနေ လာမဲ့ရွေးကောက်ပွဲတွေမှာ အမတ်နေရာတွေများများကြီးနိုင်မှာကို ရိုးရိုးသားသား မယှဉ်နိုင်သူတွေကနေ ရွှေဥာဏ်တော်စူးရောက်တာသာဖြစ်ပါတယ်။ ‘ပီအာ’ စနစ်ဟာ ကောင်းမွန်၊ သင့်မြတ်လို့၊ ဖြစ်လာမဲ့ စနစ်မဟုတ်ဘဲ၊ လုပ်ချင်နေသူတွေရဲ့ အကျိုးစီးပွါးအတွက်လုပ်တဲ့ စနစ်သာဖြစ်ပါတယ်။
‘အတွက်’ နဲ့ ‘အကွက်’ မှာ တဖက်ကမ်းခတ်အောင် ထူးချွန်သူတွေက အားတက်သရော လုံးပမ်းနေကြတာသာဖြစ်ပါတယ်။ ဂဏန်းအတွက်မှာ ဖဲသမားကိုမတုနိုင်ပါ။ ရွေးကောက်ပွဲကို ဖဲဝိုင်းလို မလုပ်သင့်ပါခင်ဗျား။ ။
ဒေါက်တာတင့်ဆွေ
၃-၆-၂ဝ၁၄
ည ၁၁ နာရီ၊ ၅၂ မိနစ်။