~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
တန်ဖိုးနည်းအိမ်ရာ စီမံကိန်းများကို ရန်ကုန်နှင့် မန္တလေးမြို့ရှိ နေရာများသာမက မြို့ကြီးများဖြစ် သည့် တောင်ကြီး၊ မော်လမြိုင်၊ ပုသိမ်၊ တောင်ငူ၊ မုံရွာ၊ မကွေးနှင့် စစ်တွေရှိ နေရာများတွင် ပြည်သူလူထု အများစု လက်လှမ်း မီစေနိုင် မည့် ပြည်သူ့အိမ်ရာ စီမံကိန်းများကို မြို့ရွာဖွံ့ဖြိုး တိုးတက်မှု စီမံကိန်းများနှင့်အညီ အကောင်အထည်ဖော် ဆောင်ရွက်ရမည် ဖြစ်ကြောင်း၊ တစ်ဖက်၌ လည်း မြန်မာနိုင်ငံ ၏ အဓိက စီးပွားရေး မြို့တော်ဖြစ်ပြီး လူဦးရေ ငါးသန်းကျော် နေထိုင်သည့် ရန်ကုန်မြို့တော် အပါအ၀င် အခြားမြို့ကြီးများ အတွက် ခေတ်မီဖွံ့ဖြိုး တိုးတက်၍ စနစ်ကျသည့် မြို့ပြစီမံကိန်း လုပ်ငန်းများကို အလေးထား လုပ်ဆောင်ရ မည် ဖြစ်ကြောင်း သမ္မတ ဦးသိန်းစိန်က စက်တင်ဘာ ၁ ရက်တွင် ပြောကြားသည့် လစဉ် ရေဒီယို မိန့်ခွန်း၌ ထည့်သွင်း ပြောကြားခဲ့သည်။
သို့သော် မြန်မာနိုင်ငံရှိ မြို့ကြီးများ၌ တန်ဖိုးနည်းအိမ်ရာ စီမံကိန်းများ ချထားပေးသည့်အခါ နီးစပ်ရာ လုပ်ငန်းရှင်များကို ချထားပေးခြင်းမျိုး မဟုတ်ဘဲ စီမံကိန်းနှင့် ပတ်သက်သည့် လုပ်ငန်းများကို ပွင့်လင်းမြင်သာမှု ရှိရှိ လုပ်ဆောင်ရန် လိုအပ်ပြီး ထိုသို့ ဆောင်ရွက်နေသော အိမ်ရာ စီမံကိန်းများသည် ပြည်သူလူထု၊ အထူးသဖြင့် အောက်ခြေ လူတန်းစားများ လက်လှမ်းမီ ၀ယ်ယူနိုင်သည့် တန်ဖိုးနှုန်းထားများသာ ဖြစ်သင့် သည်ဟု နိုင်ငံရေးပါတီများ၊ လွှတ်တော် ကိုယ်စားလှယ်များနှင့် စီးပွားရေး လုပ်ငန်းရှင်များက ဝေဖန် သုံးသပ်လျက် ရှိကြသည်။ ယင်းသို့ ဝေဖန် သုံးသပ်မှုများကို မြန်မာသံတော်ဆင့်မှ စုစည်းတင်ပြ လိုက်ပါ သည်။
တင်ဇာအောင်
● ဦးရဲမင်းအောင် (MAPCO လုပ်ငန်း အုပ်စုမှ အုပ်ချုပ်မှုဒါရိုက်တာ)
အဓိကကတော့ အခုကနေ ရှေ့လျှောက် လုပ်မယ့်ဟာပေါ့။ အရင်တုန်းက ဟာကတော့ ထားလိုက်ပါတော့။ ပြီးသွားတဲ့ ကိစ္စက ပြောရတာ ခက်တာပေါ့။ ပြီးခဲ့တဲ့ ကိစ္စတွေမှာတော့ အိမ်ရာစီမံကိန်းတွေက ပြည်သူအများစု လက်လှမ်းမီဖို့ တော်တော် ခက်တာကိုး။ ရှေ့လျှောက်လုပ်မယ့် လုပ်ငန်းစဉ်တွေမှာတော့ ပြည်သူအများစု လက်လှမ်း မီနိုင်တဲ့ တန်ဖိုးနည်းအိမ်ရာ စီမံကိန်းဖြစ်ဖို့၊ အကောင်အထည် ဖော်တဲ့အခါမှာ ထင်သာမြင်သာ ရှိဖို့ လိုအပ်တာပေါ့။ ဘာဖြစ်လို့လဲဆိုတော့ ဒီ Housing Project တွေ က နိုင်ငံတကာမှာ တချို့နိုင်ငံတွေမှာ အစိုးရ၊ အာဏာပိုင် အဖွဲ့အစည်းတွေရဲ့ ဆောင်ရွက်ပုံ၊ ဆောင်ရွက်နည်းတွေက နည်းလမ်းတကျ မဖြစ်ဘူးဆိုရင် ပြည် သူတွေ ဆန့်ကျင် ကန့်ကွက်တာတို့၊ အကျင့်ပျက် ခြစားတာတို့ ဒီလို ဇာတ်လမ်းတွေပါ ပြဿနာပေါ်တဲ့ နိုင်ငံတွေလည်း ရှိတာကိုး။ ဘာပဲပြောပြော ကိုယ့်နိုင်ငံမှာ ဆောင်ရွက်မယ် ဆိုလို့ရှိရင် ထင်သာမြင်သာရှိရှိ ဆောင်ရွက်ဖို့ လိုတာပေါ့။ ဒီ Housing Project တွေ ဆောင်ရွက်တဲ့ အခါမှာလေ။
● ဦးဖုန်းမြင့်အောင် (အမျိုးသား ဒီမိုကရေစီပါတီသစ်မှ အမျိုးသားလွှတ်တော် ကိုယ်စားလှယ်)
လက်ရှိ ကိုယ့်မဲဆန္ဒနယ်မှာလည်း အိမ်ငှားတွေ တအားများတာပေါ့။ လက်လှမ်းမမီဘူး။ မြေဈေးကြီး တာတွေပေါ့။ နိုင်ငံတော် သမ္မတရဲ့ ပြောကြားချက်ကတော့ ပြောရရင် ဒီအစိုးရ သက်တမ်းကလည်း တတိယပိုင်းကို ရောက်နေပြီလေ။ သူဒီလို ရည်ရွယ်ချက် ရှိပေမယ့်လည်း အချိန်မှ မရှိတာကိုး။ ဒါကို ဘယ်လိုလုပ်မယ် ဆိုတာတော့ စဉ်းစားလို့ကို မရဘူး။ အစိုးရလုပ်လို့ အိမ်ခြံမြေဈေးက ပိုပြီးတက်လာမယ့် အခြေအနေမျိုးကိုး။ သူတို့က အိမ်ဈေးကျအောင် လုပ်နိုင်မယ်လို့ ထင်ခဲ့တာကိုး။ ဒါပေမဲ့ ပိုတောင်ကြီးလာ သေးတယ်။ အခုဟာက စီမံကိန်းက လုပ်လို့ကိုမဖြစ်ဘူး။ စီမံကိန်းလုပ်ဖို့ လမ်းစကို မပေါ်သေးပါဘူး။ မြေမရှိဘူး၊ ရင်းနှီးမြှုပ်နှံမှု မရှိဘူး။ ၀ယ်နိုင်တဲ့ငွေကြေး ပြည်သူလူထုမှာလည်း မရှိဘူး။ ဒီဟာကြီးက မဖြစ်နိုင်တာကို ပြောနေတယ်လို့ ယူဆတယ်။
● ဒေါ်စန္ဒာမင်း (ဇမ္ဗူသီရိမြို့နယ်၊ ပြည်သူ့လွှတ်တော် ကိုယ်စားလှယ်)
တန်ဖိုးနည်းအိမ်ရာ စီမံကိန်းကို သမ္မတကြီး ပြောတာကိုလည်း ကျွန်မတို့ တွေ့ပါတယ်။ အဲဒီလိုပဲ ပြီးခဲ့တဲ့ ဒသမအကြိမ် တုန်းကလည်း လွှတ်တော်မှာ တင်ထားတာ ရှိပါတယ်။ တန်ဖိုးနည်းအိမ်ရာ စီမံကိန်းကို လာပြီးတော့ ရှင်းပြတည်းကိုက သိန်းတစ်ရာ အောက်မှာ မရှိဘူးဖြစ်တဲ့အတွက် ဘယ်လိုမှ ငွေမရှိတဲ့သူ တွေအနေနဲ့တော့ လက်လှမ်းမမီနိုင်ဘူးဆိုတာ ကျွန်မတို့အနေနဲ့ တွေ့ရှိရပါတယ်။ နောက်ပြီးတော့ တန်ဖိုးနည်း အိမ်ရာ စီမံကိန်းကို လုပ်ချင်တယ်ဆိုရင် အိမ်နီးချင်း ထိုင်းနိုင်ငံမှာရှိနေတဲ့ ထိုင်းနဲ့ဘန်ကောက်၊ မဲဆောက် သွားတဲ့ လမ်းပေါ်မှာဆိုလည်း တန်ဖိုးနည်းအိမ်ရာ စီမံကိန်းတွေ ဆောက်နေတာ တွေ့ရပါတယ်။ ဒါဆိုရင် သူတို့အနေနဲ့ အရစ်ကျငွေ ပေးချေတဲ့ စနစ်နဲ့ ပေးထားတာ ဖြစ်တဲ့အတွက် မ၀ယ်နိုင်တဲ့သူလည်း ၀ယ်နိုင် ပါတယ်။ အခု ကျွန်မတို့ တိုင်းပြည်မှာ တန်ဖိုးနည်းအိမ်ရာ စနစ်ကို လေ့လာ သုံးသပ်ကြည့်ရင် ၂ချက် တွေ့ပါတယ်။ တစ်ခုကတော့ တန်ဖိုးနည်းအိမ်ရာ စီမံကိန်းကို ဆောက်လုပ်ခွင့် ရရှိတဲ့ ကန်ထရိုက် တွေအားလုံး အကျိုးအမြတ် ရရှိသွားတယ်။ နံပါတ် ၂ ကတော့ Systemmatic (စနစ်တကျ) မရှိဘဲနဲ့ တန်ဖိုးနည်း အိမ်ရာ စနစ်ကို ရောင်းချတာ ဖြစ်တဲ့ အတွက် နောက်ဆုံးတော့ ပိုက်ဆံရှိတဲ့သူတွေ လက်ထဲကိုပဲ ဒီအိမ်ရာတွေ ရောက်သွားပြီးတော့ တကယ်ကိုပဲ ကျွန်မတို့ Target ထားနေတဲ့ အောက်ခြေ လူတန်းစား၊ အလတ်တန်းစား အဆင့်ထိကို တန်ဖိုးနည်း အိမ်ရာဆိုတာ မရနိုင်ပါဘူး။ ဘာဖြစ်လို့လဲဆိုတော့ ငွေကြေးတတ်နိုင်တဲ့ သူတွေကသာ ထပ်ခါတလဲလဲ ၀ယ်ခြင်း ဆိုတဲ့ဟာမျိုးကို မထိန်းချုပ်နိုင်သရွေ့ တန်ဖိုးနည်းအိမ်ရာ စနစ်က အောင်မြင်မှု မရှိဘူးဆိုတာ ကျွန်မတွေ့ရတယ်။ ဒီလို မထိန်းချုပ်နိုင်သရွေ့ ကျွန်မတို့ Target ထားနေတဲ့ တန်ဖိုးနည်း အိမ်ရာဟာ အောက်ခြေ လူတန်းစားတွေဆီ မရောက်နိုင်ပါဘူး။
● ဦးမင်းဇေယျ (၈၈ငြိမ်းချမ်းရေးနှင့် ပွင့်လင်းလူ့အဖွဲ့အစည်း)
အဓိကပြဿနာက အပြောတခြား အလုပ်တခြား ဖြစ်နေ တဲ့ ပြဿနာလေ။ နောက်ပြီးတော့ ပြောပြောနေတဲ့ Good Government ဆိုတဲ့ ကိစ္စတွေကလည်း တကယ့်တကယ် လက်တွေ့ပိုင်းတွေမှာ ဘာမှ အကောင်အထည် မဖော်နိုင်ဘူးလေ။ ပွင့်လင်းမြင်သာမှု မရှိတဲ့ လုပ်ငန်းတွေ တော်တော်များများက အဂတိ လိုက်စားမှုတွေ၊ လာဘ်ပေးလာဘ်ယူမှုတွေ၊ ဆရာမွေး တပည့်မွေးတွေနဲ့ပဲ ပြီးဆုံးသွားတာပေါ့လေ။ နိုင်ငံတော် သမ္မတကြီးက လစဉ်လတိုင်း မိန့်ခွန်းတွေ ရွှန်းရွှန်းဝေအောင်ပြော၊ တိုးတက်မှု အောင်မြင်မှုတွေပြော၊ ဒါပေမဲ့ ပြည်သူတွေ နေ့စဉ်နဲ့အမျှ ကြီးမြင့်လာတဲ့ ကုန်ဈေးနှုန်းတွေ၊ ဖောင်းပွလာတဲ့ ငွေကြေးတွေ၊ ရှားပါးလာတဲ့ အလုပ်အကိုင်တွေ ဒီဒဏ်တွေ တဖြည်းဖြည်း ဆိုးဝါးလာတာကို ပြည်သူတွေက ခံစားနေရတာတွေ။ ပြည်သူတွေက ဘယ်သူပဲ အာဏာယူယူ ကိုယ့်ရဲ့ စားဝတ်နေရေး ပြေလည်နေရင် ကျေနပ် နေကြတာပါပဲ။ အခုက ဆင်းရဲ ချမ်းသာမှုတွေက ကြာလေလေ ကွာဟလေ ကြာလေကွာဟလေပဲ။ အာဏာရှိသူတွေက အာဏာကို အလွဲသုံးစား လုပ်ပြီးတော့ အခွင့်ထူးခံ လူတန်းစားတွေကပဲ ရပိုင်ခွင့် အကုန်လုံး ယူထားတာလေ။ ဒီမိုကရေစီ နိုင်ငံကို ထူထောင်တယ်ဆိုတာ ခရိုနီစီးပွားရေး မဟုတ်ဘူးလေ။ လူနည်းစုကြီးပွားရေး မဟုတ် ဘူးလေ။ ကောင်းကောင်း ပြောပြီး ကောင်းကောင်း မလုပ်တာပဲ။ ရွှေသမင် ဘယ်ကထွက် မင်းကြီး တာကပဲ ထွက်နေတာ။ ပွင့်လင်းမြင်သာမှု ရှိအောင် လုပ်ဖို့လိုတယ်။ ဒီမိုကရေစီ နည်းကျရမယ်။ ပြောနေတဲ့ အနေအထားကနေ ရန်ကုန်တိုင်း အစိုးရ အဖွဲ့ကနေ ကြီးမားတဲ့ စီမံကိန်းကို လူမသိသူမသိ လုပ်နေတယ်။ ဒါတွေဟာ မဖြစ်သင့်တဲ့ ကိစ္စတွေပဲ။
● ဒေါက်တာမောင်မောင်စိုး (စီးပွားရေးပညာရှင်)
တန်ဖိုးနည်းအိမ်ရာနဲ့ ပတ်သက်လာရင် ထဲထဲဝင်ဝင်တော့ မသိဘူး။ တစ်ခုတော့ ရှိတာပေါ့။ တန်ဖိုးနည်း အိမ်ရာနဲ့ ပတ်သက်လာရင် ဆောက်လုပ်ရေးဘက်က သူတို့ရဲ့ကုန်ကျစရိတ်ကို ကြည့်ရမယ်။ သူတို့က စရိတ်ကာမိအောင် လုပ်မှာပေါ့။ အစိုးရကနေပြီးတော့ တန်ဖိုးနည်းအိမ်ရာ ဆောက်မယ် ဆိုလို့ရှိရင် အစိုးရ ဘတ်ဂျက်ကနေ အရှုံးခံ ဆောက်မယ် ဆိုရင်တောင်မှ ခေတ်ကာလ ပေါက်ဈေး ထက်ကို မလျှော့ဘူး။ ပုဂ္ဂလိက ကတော့ သူ့အတွက် မကျန်ဘဲနဲ့ လုပ်မှာ မဟုတ်ဘူး။ အဲဒီတစ်ချက် ပြန်စဉ်းစားရမယ်။ ဒုတိယအချက်က တန်ဖိုးနည်း အိမ်ရာက ဘယ် Level အထိ တန်ဖိုးနည်းအိမ်ရာ ဆိုတာကို ပြန်စဉ်းစားရမယ်။ ဟိုးအရင်ခေတ် တုန်းကတော့ တဲပေါ်မှ တိုက်ပေါ်သို့ဆိုပြီး တစ်ခါ ကြွေးကြော်သေးတယ်။ ဆရာ့အမြင်ကတော့ တန်ဖိုးနည်း အိမ်ရာက တန်ဖိုးနည်းတာပဲရှိမယ်။ လူထုတွေက ပေးနိုင် မပေးနိုင်ဆိုတဲ့ ပြဿနာက ရှိလာဦးမယ်။ ခရိုနီပဲ ပေးပေး၊ ဘယ်စီးပွားရေးသမားပဲ ပေးပေး သူတို့အတွက် ကျန်အောင် လုပ်ကြမှာပဲ။ ကျန်အောင် လုပ်ပြီ ဆိုမှတော့ တန်ဖိုးက မနည်းနိုင်တော့ဘူး။
မြန်မာသံတော်ဆင့်သတင်းဌာန -