ထိုင်းနိုင်ငံတောင်ပိုင်း စူရတ်ဌာနီခရိုင် လိပ်ကျွန်း (ခိုတောင်းကျွန်း) လူသတ်မှု စွပ်စွဲခံ လူငယ်နှစ်ဦးရဲ့ မိသားစုဝင်တွေဟာ ဒီကနေ့ညနေ လေကြောင်းခရီးနဲ့ ထိုင်းနိုင်ငံ ဘန်ကောက်မြို့ကို ရောက်ရှိခဲ့ကြပြီး မနက်ဖြန်မှာ သားငယ်တွေရဲ့ ရုံးထုတ်ကို တက်ရောက်မှာ ဖြစ်ပါတယ်။
မြန်မာသံရုံးအထူးအဖွဲ့က ရှေ့နေ ဦးအောင်မျိုးသန့်က “ကလေးမိဘတွေ (စွပ်စွဲခံ ကိုဇော်လင်းနှင့် ကိုဝင်းဇော်ထွန်းတို့ရဲ့ မိဘများ) ကျနော်တို့နဲ့ ပါလာတယ်။ ကျနော်တို့ စူရတ် (စူရတ်ဌာနီ) ကို လေယာဉ်နဲ့ဆင်းမလို့လုပ်နေတယ်။”
စက်တင်ဘာ ၁၅ ရက်နေ့က လိပ်ကျွန်းမှာ လူသတ်မှု၊ မုဒိမ်းမှုအပါအ၀င်အမှု ၇ မှုနဲ့ စွဲဆိုတဲ့အမှုကို မနက်ဖြန်ကျရင် စူရတ်ဌာနီမြို့ ကော့စမွီခရိုင်တရားရုံးမှာ ရုံးထုတ် စစ်ဆေးမှာဖြစ်ပါတယ်။
ပထမအကြိမ်ရုံးချိန်းစဉ်က တရားသူကြီးက စွပ်စွဲခံမြန်မာလူငယ်နှစ်ဦးကို အပြစ်ကျူးလွန်မှုရှိမရှိ မေးမြန်းခဲ့ရာမှာ ကျူးလွန်ခြင်းအလျဉ်းမရှိကြောင်း တရားရုံးမှာ ငြင်းဆိုခဲ့ကြပါတယ်။
တရားသူကြီးက နှစ်ဘက်သက်သေစာရင်းတွေကို ဒီရုံးချိန်းမတိုင်မီ တင်ကြဖို့ ဆုံးဖြတ်ညွှန်ကြားခဲ့ပါတယ်။ ဒီသက်သေစာရင်းတွေကို စွပ်စွဲခံရသူတွေဘက်က တင်ပြပြီးပြီလို့ မြန်မာသံရုံးအထူးအဖွဲ့က ရှေ့နေဦးအောင်မျိုးသန့်က ဒီဗွီဘီကို ပြောပါတယ်။
“ကျနော်တို့သက်သေတွေကို ဟိုတပတ်ကတည်းက တင်ပြပြီးပါပြီ။ ကြားရက်မှာ သွားတင်လိုက်ပါတယ်။ လောလောဆယ်မှာ သက်သေ (၂၇) ယောက်တင်ထားပါတယ်။”
ထိုင်းတောင်ပိုင်း လူသတ်မှုဖြစ်ပွားပြီး နှစ်ပတ်ခန့်အကြာမှာ အသက် (၂၁) နှစ်အရွယ်ရှိကြတဲ့ ကိုဇော်လင်းနဲ့ ကိုဝင်းဇော်ထွန်းတို့ကို ဖမ်းဆီးစစ်ဆေးအရာမှာ သူတို့နှစ်ဦးက ရဲထံ ကနဦးပိုင်းက ဖြောင့်ချက်ပေးခဲ့ကြပေမယ့် နောက်ပိုင်းမှာ သူတို့ကို အသက်အန္တရာယ်ခြိမ်းခြောက်တဲ့အတွက် တကယ်မကျူးလွန်ဘဲ ၀န်ခံခဲ့တာသာဖြစ်တယ်လို့ ပြောင်းလဲထွက်ဆိုပြီး ကနဦးပေးခဲ့တဲ့ ဖြောင့်ချက်တွေကို တရားဝင် ပြန်လည်ရုပ်သိမ်းထားကြပါတယ်။
မြန်မာသံရုံးအထူးအဖွဲ့ဝင်တွေဟာ လွန်ခဲ့တဲ့သီတင်းပတ်က မြန်မာပြည်ကို သွားရောက်ခဲ့ကြပြီး လိပ်ကျွန်းလူသတ်မှု စွပ်စွဲခံရမှုနဲ့စပ်လျဉ်းတဲ့ သတင်းစာရှင်းလင်းပွဲလုပ်ခဲ့သလို အစိုးရနဲ့ လွှတ်တော်တွေက တာဝန်ရှိသူတွေနဲ့ တွေ့ဆုံပြီး လူအား ငွေအား အကူအညီတွေ ရဖို့ ကတိက၀တ်တွေ ရခဲ့ကြပါတယ်။
By အေးနိုင် (ဒီဗွီဘီ)
http://burmese.dvb.no/archives/74961