လူ့အခွင့်အရေး လူ့ဂုဏ်သိက္ခာ ခရီးသွားရုပ်ရှင်ပွဲတော်ကို အထက်မြန်မာပြည် မကွေး မုံရွာနှင့် မန္တလေးမြို့များ၌ လှည့်လည်ပြသရာတွင် သက်ဆိုင်ရာမှ ပြသခွင့် ပါမစ်မပေးသော်လည်း မိမိတို့အနေဖြင့် ရပ်ရွာအခြေပြု လူမှုရေးအဖွဲ့များ၏ အကူအညီဖြင့် ပြသနိုင်ခဲ့ကြောင်း ဒါရိုက်တာ မင်းထင်ကိုကိုကြီး က ပြောသည်။
“မကွေးမှာ ခရီးသွားရုပ်ရှင်ပွဲတော်ပြဖို့ ပါမစ်တင်တော့ ပြခွင့်ရမယ် မရဘူးဆိုတာ သေသေချာချာ မသိရဘူး။ ပြမယ့်ရက်က ၂၈ ရက် ၂၉ ရက် ညနေ ၆ နာရီကျမှ သက်ဆိုင်ရာက ပါမစ်ချမပေးဘူးဆိုတော့ ရုံပိုင်ရှင်ကလည်း မပြရဲဘူးပေါ့။ ဒါနဲ့ အဲဒီက လူမှုရေးအသင်းအဖွဲ့တွေရဲ့ အကူအညီနဲ့ပဲ လူ ၁၀၀၀ ကျော်ဆံ့တဲ့ ခန်းမတစ်ခုမှာ သွားပြရတယ်။ အဲဒီခန်းမပိုင်ရှင်ကလည်း လုပ်ရဲကိုင်ရဲတဲ့ သတ္တိရှိလို့ပေါ့။ အဲဒီမှာ သုံးပွဲစလုံး လူ ၁၀၀၀ နီးပါးလောက် လာရောက်အားပေးပါတယ်” ဟု ၄င်းက ပြောသည်။
လူ့အခွင့်အရေး လူ့ဂုဏ်သိက္ခာ ခရီးသွားရုပ်ရှင်ပွဲတော်ကို မကွေး ၊ မုံရွာ ၊ မန္တလေး မြို့တို့တွင် လှည့်လည်ပြသခဲ့ရာ မုံရွာနှင့် မန္တလေးတွင်လည်း ပါမစ်မပေးကြောင်း သိရသည်။
“မုံရွာမှာလည်း ဒီအတိုင်းပဲ၊ မုံရွာမှာက သြဂုတ် ၃၁ ရက်ကပြတာ ၃၀ ရက်ညပိုင်းအထိ ပါမစ်မပေးဘူး။ မပေးလည်း ပြမယ်ဆိုပြီး မြစန္ဒာရုံမှာပြတယ်၊ မန္တလေးမှာကျတော့ မင်္ဂလာကုမ္ပဏီက ၀င်းလိုက်အဆင့်မြင့် ရုံကို ငှားပြီးပြဖို့ ခွင့်တောင်းပေမယ့် မင်္ဂလာ ကုမ္ပဏီက ဘာမှ အကြောင်းပြန်မလာတဲ့အတွက် ရီမြင့်ရုပ်ရှင်ထုတ်လုပ်ရေးက ကိုဇော်မြင့်ရဲ့ နေပြည်တော်ရုံမှာပဲ ပြလိုက်မယ်” ဟု ၄င်းက ဆက်လက်ပြောကြားသည်။
လူ့အခွင့်အရေး လူ့ဂုဏ်သိက္ခာ ခရီးသွားရုပ်ရှင်ပွဲတော်တွင် ဆင်ဆာကျပြီး ဇာတ်ကား ၄၅ ကားအနက် ၁၀ ကားကို မကွေး ၊ မုံရွာ ၊ မန္တလေး မြို့တွင် ပြသပေးခဲ့ရာ အောင်ဆန်းစုကြည်ဆုရ အကျဉ်းစံဘ၀၊ မင်းကိုနိုင်ဆုရ အဖြူန့အစိမ်း၊ မတ် ၁၃ ရက် ဆုရ စစ်တုရင်၊ Vaclar Havel Library ဆုရ ‘အခွင့်အရေး’ ၊ NBC ဆုရ ‘အိမ်အပြန်’ ဇာတ်ကားများအပါအ၀င် မှတ်တမ်းရုပ်ရှင်များ ဇာတ်လမ်းတိုရုပ်ရှင်များကို မန္တလေး နေပြည်တော် ရုပ်ရှင်ရုံတွင် မွန်းတည့် ၁၂ နာရီမှ ည ၈ နာရီထိ ပြသခဲ့ကြောင်း သိရသည်။
မန်းမောင်မောင်
မန္တလေး ၊ စက်တင်ဘာ ၁
[Venus News Weekly Vol 5, No.6, September, 2013, Thursday]