စိတ်အနှောက်အယှက်ဖြစ်စရာပေါ့။ အင်ဗာတာဖွင့်တော့လည်း ခဏပဲ မီးအားမနိုင်လို့ ပြန်ပြုတ်ကျတယ်။ အဲတော့ ဖွင့်ပွဲ ပိတ်ပွဲရဲ့ ရင်သပ်ရှုမော ကြီးကျယ်ခမ်းနားပုံကို အဆုံးအထိ မမြင်လိုက်ရဘူးပေါ့။ လျှပ်စစ်မီးက ဘာကြောင့် အဲလိုဖြစ်နေတယ်ဆိုတာ အဖြေရှာကြဖို့လိုမယ်။ အိမ်တွေမှာရှိတဲ့ လျှပ်စစ်ပစ္စည်းတွေအတော်များများ အဲဒီပုံစံနဲ့ဆို ကြာကြာဘယ်ခံမလဲ။
ဘာပဲပြောပြော ဆီးဂိမ်းပြိုင်ပွဲက ဘယ်လိုမှ ထင်မှတ်မထားတဲ့ အောင်မြင်မှုနဲ့ ပြီးဆုံးသွားပြီ။ ကျနော်အနေနဲ့ပြောရရင် မြန်မာအားကစားသမားတွေကို ဒီလောက်အထိ မျှော်လင့်မထားခဲ့ဘူး။ ဒီလောက်အထိ ဆုတံဆိပ်တွေလည်း ရလိမ့်မယ်လို့ ထင်မထားဘူး။ အမြင့်ဆုံး နံပါတ်လေးနေရာလောက်ကို မလေးရှားနဲ့ လုရလိမ့်မယ်လို့ပဲ ထင်ထားတာ။ မြန်မာအားကစားသမားတွေကို အထင်သေးလို့တော့မဟုတ်ဘူး။ သူတို့တတွေခမျာ ပြိုင်ဖက်နိုင်ငံတွေက အားကစားသမားတွေလောက် ပံ့ပိုးကူညီမှု ရခဲ့ရှာတာမဟုတ်ဘူး။ မြန်မာ ဆိုတဲ့ စိတ်ဓာတ်နဲ့ ကိုယ့်မြေ၊ ကိုယ့်ရေ၊ ကိုယ့်ကွင်းမှာ ဂုဏ်သိက္ခာရှိရှိ ပြိုင်ပွဲဝင်ချင်လို့သာ ဇွဲတင်း၊ အားယူပြီး ပြိုင်ခဲ့ကြတာ။ အဲတော့ တကယ် လှိုက်လှိုက်လှဲလှဲ ချီးကျူးဂုဏ်ပြုသင့်တာက မြန်မာအားကစားသမားတွေပဲ။ တကယ်ဆို သူတို့ခမျာ ပြင်ဆင်ချိန်၊ လေ့ကျင့်ချိန်တိုတိုလေး၊ ထောက်ပံ့မှု နည်းနည်းလေး၊ အားပေးမှု မဆိုစလောက်လေးနဲ့ ကိုယ်အိမ်က ပိုက်ဆံမှာသုံး၊ ငပိကြော်၊ ငါးခြောက်ကြော်မှာစားပြီး ထန်းလျက်ခဲကိုက်၊ ငပိရည်နဲ့စားပြီး အင်အားစုစည်းခဲ့ကြရရှာတာ။ လေ့ကျင့်တဲ့ပစ္စည်းတွေလည်း သွားကြည့်အုံး။ အိမ်နီးချင်းနိုင်ငံတွေလို တန်းမီ၊ စံမီ ပစ္စည်း ဘယ်နှခုပါသလဲဆိုတာ။
ဖွင့်ပွဲ၊ ပိတ်ပွဲသုံးတဲ့ ပိုက်ဆံရဲ့ ဆယ်ပုံတစ်ပုံလောက် အားကစားသမားတွေကိုသာ ထောက်ပံ့၊ ပြင်ဆင် လေ့ကျင့်ရင် ဆုတံဆိပ် ဒီ့ထက်မကရပြီး အောင်မြင်မှုပိုရမယ်လို့တောင် ထင်တယ်။ ဖွင့်ပွဲ ပိတ်ပွဲကလည်း ဆီးဂိမ်းပြိုင်ပွဲတစ်လျှောက် အခမ်းနားဆုံးလို့ ပြောကြတယ်။ ဟုတ်လည်း ဟုတ်လောက်တယ်။ အင်မတန်ကို အဆင့်အတန်းမြင့်တယ်။ ဘယ်သူက ကူညီကူညီ အဲဒါ ပြဿနာတော့မဟုတ်ဘူး။ မနေ့တနေ့ကမှ စနစ်ပြောင်းဖို့ဟန်ပြင်နေတဲ့နိုင်ငံ၊ ကမ္ဘာ့အဆင်းရဲဆုံး စာရင်းဝင် နိုင်ငံတစ်ခုလို့ တစ်ကမ္ဘာလုံးက သိထားတဲ့နိုင်ငံမှာ အကူအညီမပါဘဲ ဘယ်လိုဖြစ်နိုင်မလဲ။ ကိုယ့်ထက် ချမ်းသာတဲ့နိုင်ငံတွေတောင် ဒီလိုပွဲမျိုးဆို ကိုယ့်ထက် တတ်ကျွမ်းနားလည်ပြီး အတွေ့အကြုံရှိတဲ့ မိတ်ဆွေနိုင်ငံတွေကနေ အနည်းနဲ့အများဆိုသလို အကူအညီယူရတာချည်းပဲ။
အရေးကြီးတာက ဒီပြိုင်ပွဲကြီးကို အကြောင်းပြုပြီး ကျနော်တို့နိုင်ငံရဲ့ ပုံရိပ်နဲ့ ဂုဏ်သိက္ခာအဆင့်အတန်း မြှင့်တင်ပေးနိုင်ဖို့ပဲ။ တစ်ခုတော့ရှိတယ်၊ ဖွင့်ပွဲ၊ ပိတ်ပွဲ ခမ်းနားကြီးကျယ်တာကိုပဲကြည့်ပြီး သိပ်အကောင်းမြင်လွန်းတာမျိုး၊ ကူညီသူရဲ့ပုံရိပ်ကိုကြည့်ပြီး သိပ်အဆိုးမြင်လွန်းတာမျိုး စတဲ့ အစွန်းနှစ်ပါးတော့ လွတ်ဖို့လိုမယ်။ မီဒီယာဆိုတာက ကောင်းတာတွေ့ရင် ကောင်းသလို ချီးကျူးပြီး လိုအပ်ချက်၊ အားနည်းချက်တွေ့ရင် ထောက်ပြအကြံပြုဖို့ တာဝန်ရှိတယ်။ တစ်လောကလုံးက ဆီးဂိမ်းကို အကောင်းမြင်နေကြတဲ့အချိန် နည်းနည်း ဝေဖန်ဆန်းစစ်တဲ့အမြင်တဲ့ တင်ပြတဲ့ မီဒီယာတွေကိုလည်း နားလည်ပေးကြဖို့ မေတ္တာရပ်ခံချင်တယ်။
အဲတော့ ရထားတဲ့ ဘတ်ဂျက်ထဲကနေ ဂွင်အမျိုးမျိုးဖန်ပြီး ကိုယ့်သား၊ ကိုယ့်သမီး၊ ကိုယ့်တူ၊ ကိုယ့်သမက်ပိုင်တဲ့ ကုမ္ပဏီတွေကို ကန်ထရိုက်ပေး၊ အသေးအဖွဲ ဆိုင်ခန်းနေရာလေးတွေကိုတောင် ဝန်ကြီးဌာန နာမည်တွေနဲ့ ဦးအောင်ယူထားပြီး လုပ်ငန်းရှင်ငယ်တွေကို အမြတ်တင်ပြန်ငှားစား၊ ဝန်ကြီးဌာန နာမည်တွေနဲ့ ကိုယ်တိုင်မကြည့်ပဲ ထုတ်ရောင်းစားလို့ တကယ်အားပေးမယ့် ပရိသတ်တွေက မှောင်ခိုကနေ ဈေးမတန်တဆပေးဝယ်ကြည့်ရ၊ ဘာမှ ခဲယဉ်းတဲ့ စီမံခန့်ခွဲမှုမဟုတ်တဲ့ တန်းစီအောင် စနစ်တကျ ပြင်ဆင်တာမျိုး မရှိ( ဥပမာ မဖြစ်မနေတန်းစီစေရန် လိုင်းများ၊ ကြိုးများဖြင့် ကန့်ထားခြင်းမျိုး)၊ အားကစားပွဲလာပြိုင်တဲ့ ဒေသတွင်းနိုင်ငံတွေက ကစားသမားတွေ၊ အားပေးတဲ့ ပရိသတ်တွေအဖို့ အစစအရာရာ နိုင်ငံတကာထက် ဈေးကြီးကြီးနဲ့ ဝယ်နေရတာမျိုး၊ ပွဲမတိုင်ခင်က ကြွားလုံးထုတ်ထားပေမယ့် အင်မတန် နှေးကွေးလေးလံတဲ့ အင်တာနက်မြန်နှုန်း ဆိုတာတွေက ရှက်တတ်ရင် ရှက်စရာသိပ်ကောင်းတဲ့ ကိစ္စတွေ။ နိုင်ငံတကာက အကဲဖြတ်ဒိုင်တွေနဲ့ တာဝန်ရှိသူတွေကို အရှေ့တောင်အာရှ အားကစားပြိုင်ပွဲ စံနှုန်းတွေအတိုင်း လျာထားတဲ့ ဘတ်ဂျက်အတိုင်း အတိအကျ မသုံးပဲ ထုံးစံအတိုင်း ခုတ်၊ ထစ်၊ လှီး၊ ဖြတ်၊ ခွာ၊ ခြစ်၊ ပွတ်ပြီး မြန်မာစတိုင်လ်နဲ့ ဧည့်ခံရင်တော့ ဒိုင်တွေရဲ့ ဂွင်ထဲကနေ အညစ်ခံရမှာပဲ။ အိမ်ရှင်ဆိုတဲ့ အားသာချက်ကိုတောင် အသိအမှတ်မပြုခံရပဲ အမျိုးသား၊ အမျိုးသမီး ဘောလုံးပြိုင်ပွဲတွေမှာ ပြိုင်ဘက်အသင်းတွေဖက်ကတောင် ညစ်ပေးတာခံရတာ ဘာကြောင့်လဲဆိုတာ အဲလို ညစ်တဲ့ ဒိုင်တွေကို ဆဲမနေပဲ ဘောလုံးအဖွဲ့ချုပ်အနေနဲ့ ကိုယ့်ဘက်က ဘာများလိုအပ်ချက်ရှိသွားသလဲဆိုတာ အဖြေရှာကြည့်ဖို့လိုမယ်။ ဘောလုံးကသာ ရွှေရလိုက်ရင် မြန်မာတစ်မျိုးသားလုံးရဲ့ စိတ်ဓာတ်တွေ အင်မတန် တက်ကြွပျော်ရွှင်သွားမယ်၊ အရာရာအပေါ် အကောင်းမြင်စိတ်ကဲလာမယ်၊ အချင်းချင်းအကြား ပိုပြီး စည်းလုံးညီညွတ်လာမယ်၊ အသွင်ကူးပြောင်းရေး၊ တန်းတူညီမျှရေး၊ ငြိမ်းချမ်းစွာ အတူယှဉ်တွဲနေထိုင်ရေးတွေမှာ စိတ်ရွှင်ရွင်လန်းလန်းနဲ့ ဝိုင်းဝန်းကူညီလာနိုင်မယ်။
ကျနော်မြင်ချင်တာက လိပ်ခဲတည်းလည်း မြန်မာ့နိုင်ငံရေးကစားပွဲကြီးကို ဆီးဂိမ်းအားပေးကြသလို ပွင့်လင်းလွတ်လပ်တဲ့ လူ့အဖွဲ့အစည်း သို့မဟုတ် ဒီမိုကရေစီပန်းတိုင်ရောက်ဖို့ တစ်စိတ်တည်း တစ်ဝမ်းတည်း တက်ညီလက်ညီ အားထုတ် ကြိုးစားကြဖို့ပါ။ အသင်းအဖွဲ့အလိုက်ပြိုင်ရတဲ့ လက်ဆင့်ကမ်းပြေးပွဲလို ကိုယ့်ကျရာနေရာကနေ တာဝန်ကျေကျေ၊ စေတနာပါပါ၊ ဇွဲသန်သန် ကိုယ်စီ အားထည့်လိုက်ကြရင် ခရီးတိုတိုနဲ့ ရောက်နိုင်မယ်လို့ ထင်တယ်။
အဲဒီအတွေးတွေနဲ့ ဒီနေ့ထုတ် သတင်းစာအတွက် ခေါင်းကြီး ရေးဖြစ်တယ်။ ဝေဖန်ဖို့၊ လွတ်လပ်စွာ သဘောထားကွဲလွဲဖို့နဲ့ ဆင်ခြင်သတိပြုမိဖို့ မျှဝေပါတယ်။
အားကစားပြိုင်ပွဲများက ပေးသော သင်ခန်းစာ
မြန်မာနိုင်ငံက အိမ်ရှင်နိုင်ငံအဖြစ် လက်ခံ ကျင်းပလျက်ရှိသည့် (၂၇) ကြိမ်မြောက် အရှေ့တောင်အာရှ အားကစားပြိုင်ပွဲ ပြီးဆုံးသွားပြီ ဖြစ်သည်။ မကြာသေးခင် အချိန်က ဝဏ္ဏသိဒ္ဓိ အားကစားပြိုင်ကွင်းအတွင်း ပိတ်ပွဲ အခမ်းအနားကို ခြိမ့်ခြိမ့်သဲသဲ ကျင်းပခဲ့သည်။ စုစုပေါင်း အားကစားနည်း ၄၄ မျိုးအတွက် ဆုတံဆိပ် ၅၅၄ ဆု ချီးမြှင့်ပေးခဲ့ရာ ဒီဇင်ဘာလ ၂၂ ရက် ပြိုင်ပွဲအားလုံး ပြီးဆုံးချိန်တွင် မြန်မာ အားကစားအဖွဲ့က ရွှေတံဆိပ် ၈၆ ခု၊ ငွေတံဆိပ် ၆၂ ခု၊ ကြေးတံဆိပ် ၈၅ ခု စုစုပေါင်း ဆုတံဆိပ် ၂၃၃ ဖြင့် နိုင်ငံအလိုက် ဒုတိယနေရာတွင် ရပ်တည်ခဲ့သည်။
ပြီးခဲ့သည့် ၂၀၁၁ ခုနှစ်က အင်ဒိုနီးရှား နိုင်ငံတွင် ကျင်းပခဲ့သော (၂၆) ကြိမ်မြောက် အရှေ့တောင်အာရှ အားကစားပြိုင်ပွဲတွင် ရွှေတံဆိပ် ၁၆ ခုဖြင့် အဆင့်ခုနစ် နေရာသာ ရရှိခဲ့ခြင်းနှင့် နှိုင်းယှဉ်လျှင် အဆပေါင်းများစွာ ခုန်ပျံ တိုးတက်လာခြင်းဟု ဆိုနိုင်သည်။ မြန်မာ ပြည်သူလူထု အများစု၊ မီဒီယာများနှင့် လေ့လာသုံးသပ်သူ များကမူ မြန်မာ အားကစားသမားများ ဤမျှလောက်အထိ ဆုတံဆိပ်များ ရယူနိုင်လိမ့်မည်ဟု မျှော်လင့်မထားကြပေ။ အမြင့်ဆုံးအဆင့် စတုတ္ထနေရာလောက်သာ ဝင်နိုင်လိမ့်မည်ဟု ခန့်မှန်းထားကြသည်။ သို့သော် ပြီးခဲ့သည့် စနေနေ့က ထိုခန့်မှန်းချက်များ မှားယွင်းကြောင်း မြန်မာ့ရိုးရာ လှေလှော်နှင့် မွေလက်ရွေးစင် အားကစား သမားများက သက်သေပြသွား ခဲ့ကြသည်။
စင်စစ်အားဖြင့် မြန်မာ့လက်ရွေးစင် အားကစားသမားများ ဤမျှလောက် အောင်ပွဲရခြင်းမှာ ပရိသတ်၏ အားပေးမှု၊ အားကစားသမားများ၏ စိတ်ဓာတ်၊ သက်ဆိုင်ရာ၏ ပံ့ပိုးကူညီမှု တို့ကြောင့်ဟူသော ယေဘုယျဆန်ဆန် အကြောင်းများထက် ပိုသည်ဟု ပြောနိုင်သည်။ ပွင့်လင်းစွာ ပြောရလျှင် မြန်မာအားကစားသမား အများစုမှာ လဲစရာဝတ်စုံ၊ လေ့ကျင့်စရာ နိုင်ငံတကာ အဆင့်မီ ကိရိယာ ပစ္စည်းများ၊ အာဟာရနှင့် ကျန်းမာရေးကို စနစ်တကျ တွက်ချက် ကျွေးမွေးသော အစားအသောက်နှင့် စိတ်ဓာတ် လုံခြုံမှု ရှိစေရန်ပေးသော နေ့တွက်စရိတ် အစရှိသည်တို့ကို ပြိုင်ဘက် နိုင်ငံများကဲ့သို့ လုံလောက်စွာ မရရှိခဲ့ပေ။ ငါးပိရည်၊ တို့စရာနှင့် ထန်းလျက်ခဲစားကာ ဝတ်စုံတစ်စုံကို ဖန်တစ်ရာတေ ဝတ်ဆင်ပြီး စိတ်ဓာတ်သက်သက်ဖြင့် ပြိုင်ပွဲဝင် အနိုင်ရခဲ့သည့် မြန်မာ အားကစားသမားများ၏ စွမ်းဆောင်ရည်မှာ များစွာ ထူးကဲလှသည်ဟု ဆိုနိုင်သည်။
ဤအားကစားပြိုင်ပွဲသည် အနှစ်လေးဆယ်ကျော်ကြာ တိမ်မြုပ်နေခဲ့သော မြန်မာတို့၏ ပင်ကို စွမ်းရည် များကို ဖော်ထုတ် ပြသလိုက်သည့်ပွဲ ဖြစ်သည့်အပြင် နိုင်ငံရေး အယူအဆနှင့် အခြားအခြားသော ကွဲပြားခြားနား အရေးကိစ္စများစွာ ရှိနေသော်လည်း အားကစားပြိုင်ပွဲ ခေါင်းစဉ်အောက်တွင် တစ်မျိုးသားလုံး တစ်စိတ်တည်း တစ်ဝမ်းတည်း အားပေးပံ့ပိုးခဲ့ကြသည့် ပွဲဟုလည်း ဆိုရပေမည်။
အနှစ် ၅၀ ကျော်ခန့် ဗဟိုက တင်းကျပ်စွာ ချုပ်ကိုင်မှုနှင့် စစ်အာဏာရှင် စနစ်အောက်တွင် ရှိနေခဲ့သော နိုင်ငံတစ်နိုင်ငံ အနေနှင့် အနှစ်လေးဆယ်ကျော်ကြာမှသာ အိမ်ရှင်အဖြစ် ပထမဦးဆုံးအကြိမ် အိမ်ရှင်အဖြစ် လက်ခံကျင်းပခဲ့ခြင်း ဖြစ်သောကြောင့် အားနည်းချက်များစွာ ရှိနေသေးသည်။ ထိုအားနည်းချက် များကိုလည်း သင်ခန်းစာအဖြစ် မှတ်ယူပြီး နောင်ပြိုင်ပွဲများတွင် အားသာချက်အဖြစ် ပြောင်းကာ ယခုထက် သာလွန်သော အောင်မြင်မှု ရရှိရန် စွမ်းဆောင် နိုင်လိမ့်မည်ဟု မျှော်လင့်သည်။
ထို့အတူ လက်ရှိ အခြေအနေအရ လိပ်ခဲတည်းလည်း ဖြစ်နေသော မြန်မာ့နိုင်ငံရေး မရေရာ မသေချာမှုများ၊ ပုဂ္ဂိုလ်ရေး အားပြိုင်မှု များကိုလည်း အရှေ့တောင်အာရှ အားကစားပြိုင်ပွဲတွင် ရှိခဲ့သော တစ်စိတ်တစ်ဝမ်းတည်း စိတ်မျိုးဖြင့် အမျိုးသား စည်းလုံး ညီညွတ်ရေး၊ ငြိမ်းချမ်းရေး၊ ဒီမိုကရေစီအရေး၊ လူ့အခွင့်အရေးတို့ကို သန်းခြောက်ဆယ်သော ပြည်သူလူထုအတွက် ဆောင်ကြဉ်း ပေးကြပါမည့် အကြောင်း အထူးတိုက်တွန်း အပ်ပေသည်။
အယ်ဒီတာ (၂၂-၁၂-၂၀၁၃)
Kyaw Min Swe