~~~~~~~~~~~~~~~~~~~~~~~~~~~~~~~~~~~~~~~~~~~~~~~
လွန်ခဲ့တဲ့ လပိုင်းက နေပြည်တော်ကို အလည်ရောက်တော့ သူငယ်ချင်းက လွှတ်တော် အဆောက်အအုံကြီးကို လိုက်လံပြသပါတယ်။ ပြီးတော့ညွှန်မှူး၊ ညွှန်ချုပ်အိမ်ရာတွေ၊ ဒုဝန်ကြီး၊ ၀န်ကြီး အိမ်ရာတွေကိုလည်း လိုက်လံ ကြည့်ရှုခွင့် ရခဲ့ပါတယ်။ ရင်သပ်ရှုမောဖွယ်ရာ အံ့ဘနန်း လွှတ်တော် အဆောက်အအုံကြီးရဲ့ ခမ်းနားကြီးကျယ်ပုံ ကိုကြည့်နေရင်း အတွေးစတချို့က ခေါင်းထဲ ပြေးဝင်လာတယ်။ ဒုဝန်ကြီး၊ ၀န်ကြီးတွေ နေထိုင်ရာ တိုက်တာ အဆောက်အအုံ တွေရဲ့ ထည်ဝါပုံကို ကြည့်ပြီးလည်း အတွေးတွေက ခေါင်းထဲမှာ ဒေါင်ချာစိုင်းနေ ပါ တော့ တယ်။ နောက်ပြီး သူငယ်ချင်းက သမ္မတ အိမ်တော်ရာကြီးကို အဝေးက လှမ်းပြတော့ ““ကမ္ဘာပေါ်မှာ အခမ်းနားဆုံး သမ္မတ အိမ်တော်ရာပဲကွ””လို့ သူငယ်ချင်းကို ပြန်ပြောမိလိုက်တယ်။ အမှန်တော့ သမ္မတ အိမ်တော်ရာတင် မဟုတ်ပါဘူး။ လွှတ်တော် အဆောက်အအုံကြီးကလည်း ကမ္ဘာ့ဂရင်းနစ် စံချိန်တင် လောက်အောင် ခမ်းနားထည်ဝါလွန်းပါတယ်။ ဥရောပနဲ့ အနောက်နိုင်ငံက ဧည့်သည်တော်တွေ လွှတ်တော်ကို လာလေ့လာတိုင်း မြန်မာပြည် ဆင်းရဲနုံချာတယ်ဆိုတာ မယုံနိုင်အောင် ဖြစ်ရပါတယ်လို့ သုံးသပ်ပြောကြားချက် တွေကို တစ်ဆင့်စကားနဲ့ ကြားဖူးခဲ့တာလည်း ပြန်အမှတ်ရနေ မိပါတယ်။
နေပြည်တော်ကြီး ခမ်းနားကြီးကျယ်မှုဟာ မြန်မာပြည်သား တစ်ယောက်အတွက် ဂုဏ်ယူဖွယ်ရာလား ဆိုတဲ့ မေးခွန်းကို လက်ရှိ အာဏာပိုင်တွေကို မေးစမ်း ချင်စိတ်တွေလည်း တဖွားဖွား ပေါ်လာပါတယ်။ အရှေ့တောင် အာရှမှာ အဆင်းရဲဆုံးနိုင်ငံ၊ အာရှတစ်ခွင်လုံးမှာ အာဖဂန်နစ္စတန်ပြီးရင် အဆင်းရဲ အမွဲတေဆုံး နိုင်ငံဖြစ်တဲ့ မြန်မာပြည်မှာ ဒီလိုခမ်းနားတဲ့ နိုင်ငံတော် အဆောက်အအုံတွေရှိတာ ဂုဏ်ယူစရာ ဟုတ်မဟုတ် ဆိုပြီး ထပ်ဆင့် မေးခွန်းလေးများ မေးခွင့်ရရင် သိပ်ကောင်းမှာပဲလို့လည်း စဉ်းစားမိတယ်။
၂၀၁၅ အလွန်မှာ ဒီလိုခမ်းနားကြီး ကျယ်တဲ့ သမ္မတ အိမ်တော်ရာကြီးမှာ လက်ရှိ စစ်ဗိုလ်ချုပ်ကြီးဟောင်း သမ္မတ ဦးသိန်းစိန်နေရာမှာ စစ်ဗိုလ်ချုပ်ဟောင်းမဟုတ်တဲ့ အတိုက်အခံအရပ်သား တစ်ဦးဦးများ နေထိုင်ခွင့် ရခဲ့မယ်ဆို အခုလက်ရှိ အာဏာပိုင်တွေ မုဒိတာ ပွားနိုင်ပါ့မလား ဆိုတာလည်း ကြိုတင်မှန်းဆ သိချင်နေမိ တယ်။ ပြီးတော့ ကြံ့ခိုင်ရေး အမတ်တွေ ဇာတ်စီး၊ ကြီးစိုးထားတဲ့ ကမ္ဘာ့အခမ်းနားဆုံး လွှတ်တော်ကြီးမှာ အတိုက်အခံ အမတ်တွေ အများစု လွှမ်းမိုးသွားမယ်ဆို လက်ရှိကြံ့ခိုင်ရေး ဥပဒေပြု အမတ်တွေ ကြည်ကြည် ဖြူဖြူနဲ့ မုဒိတာပီတိ ဖြစ်နိုင်ပါ့မလား ဆိုတာလည်း သိချင်နေမိ ပြန်ပါတယ်။
တကယ်တော့ နေပြည်တော် မြို့တော်သစ်ကြီးဟာ ယခင်စစ်အာဏာရှင် အကြီးအကဲ ဗိုလ်ချုပ်မှူးကြီး သန်းရွှေ ကိုယ်တိုင် စနစ်တကျ စီမံဖန်တီးခဲ့တဲ့ မြို့တော်ကြီးပဲ ဖြစ်ပါတယ်။ ၂၀၀၆ ခုနှစ်အတွင်း စစ်ဆင်ရေး ညှိနှိုင်း အစည်းအဝေး တစ်ခုမှာ ဗိုလ်ချုပ်မှူးကြီးသန်းရွှေက “Heart Land theory” အရ မြို့တော်သစ် တည်ရကြောင်း ပြောကြားခဲ့တယ်လို့ နိုင်ငံခြား သတင်းဌာန တစ်ခုက ဖော်ပြခဲ့ဖူးတယ်။ ဒါပေမဲ့ ဒါဟာ အကျိုး အကြောင်း ခိုင်လုံတဲ့ အကြောင်းပြချက်ကောင်း တစ်ခုတော့ မဟုတ်ပါဘူး။ ပညာရှင်တွေ သုံးသပ်ချက်အရ ‘Xenophobia’ လို့ခေါ်တဲ့ “နိုင်ငံခြားကြောက်ရောဂါ”နဲ့ ‘Superstition’ လိ်ု့ခေါ်တဲ့ “အယူသီးမှု” အချက်နှစ်ချက် အပေါ်မှာ အခြေပြုစဉ်းစားပြီး မြို့တော်ကြီးကို တည်ဆောက်ခဲ့တာ ဖြစ်ပါ တယ်။ နေပြည်တော်ဟာ အာဏာရှင် ဟောင်းကြီးနဲ့ တပည့်လက်သား လက်ရှိ အာဏာပိုင်တွေအတွက် ပထ၀ီ အနေအထားအရ ရုပ်ပိုင်းဆိုင်ရာ စိတ်ပိုင်းဆိုင်ရာ လုံခြုံမှုကို အပြည့်အ၀ ပေးစွမ်းနိုင်စွမ်း ရှိပါတယ်။ စစ်ရုံးချုပ် အပါအ၀င် အရေးကြီး စစ်ဘက်ဆိုင်ရာ အဆောက်အအုံ တွေကိုလည်း တောတောင်တွေကို နောက်ခံ အကာအကွယ်ယူပြီး တည်ဆောက် ထားလို့ အတော်ကို စနစ်ကျတဲ့ လုံခြုံမှုအနေအထားနဲ့ အာဏာရှင်ဟောင်းကြီး အနေနဲ့ အေးအေး လူလူ စာဖတ်နေနိုင်တာလည်း ဖြစ်နိုင်ပါတယ်။
ဒီဆောင်းပါးမှာ အဓိက ဆိုလိုချင်တဲ့ အချက်က ဒီလို အစစအရာရာ လုံခြုံပြီး မိမိတပည့်လက်ရင်း စစ်ဗိုလ်ချုပ်ကြီးဟောင်းတွေ ၀န်းရံထားတဲ့ နေပြည်တော်ရဲ့ တစ်နေရာမှာ စိတ်အေးလက်အေး ဖြစ်နေတဲ့ အာဏာရှင်ဟောင်းကြီး အနေနဲ့ သူ့အနား ၀န်းကျင်မှာ နှစ်ပေါင်းနှစ်ဆယ်ကျော် ရန်သူသဖွယ် သူဆက်ဆံခဲ့တဲ့ အတိုက်အခံတွေ ကြီးစိုးလာရင် အာဏာရှင်ဟောင်းကြီး စိတ်မသက်မသာ ဖြစ်မလား ဆိုတာ သုံးသပ်ကြည့်တဲ့ သဘောပါ။ အာဏာတည်မြဲဖို့ ၂၀၀၈ အခြေခံဥပဒေနဲ့ ခံကတုတ်ယူပြီး ကာကွယ်ထားတယ် ဆိုပေမယ့်လည်း ပြည်သူ့ထောက်ခံမှု အားကောင်းတဲ့ NLD ပါတီက မဲအပြတ် အသတ် နိုင်ပြီး ဒေါ်အောင်ဆန်းစုကြည်သာ သမ္မတဖြစ်ခဲ့လို့ သမ္မတ အိမ်တော်ရာမှာ နေထိုင် တာဝန်ထမ်းဆောင် မယ် ဆိုရင် အာဏာရှင်ဟောင်းကြီးနဲ့ စစ်ဗိုလ်ချုပ် ဟောင်းကြီးတွေ ဘယ်လိုမှ စိတ်သက်သာမှုရမှာ မဟုတ်ပါဘူး။ ဒေါ်လာ ငါးဘီလီယံလောက် အကုန်အကျခံ တည်ဆောက်ထားတဲ့ နေပြည်တော်မှာ အတိုက်အခံတွေ ကြီးစိုးသွားရင် အာဏာရှင် ဟောင်းကြီး စိတ်ချမ်းမြေ့မှာ မဟုတ်ပါဘူး။ ကြီးကျယ်ခမ်းနားတဲ့ ၀န်ကြီးအိမ်ရာတွေမှာ အတိုက်အခံ ၀န်ကြီးတွေသာ နေထိုင်ရတော့မယ်ဆိုရင် ယခင်အာဏာပိုင်များ စိတ်လုံခြုံမှု ရနိုင်မယ် မထင်ပါဘူး။ ဇိမ်ခံ မူးယစ်စရာ တိုက်တာ အဆောက်အအုံကြီးတွေကို ဘယ်လိုမှ လက်လွှတ်ချင်မှာ မဟုတ်ပါဘူး။ ဥပမာ ၂၀၁၅ ရွေးကောက်ပွဲမှာ အတိုက်အခံ NLD အမတ်တွေ အများစု အနိုင်ရလို့ နေပြည်တော်မှာ လွှမ်းမိုးသွားပြီ ဆိုပါစို့။ ဗိုလ်ချုပ်မှူးကြီးရဲ့ နေအိမ်မနီး မဝေးမှာ အခမ်းအနား လုပ်တယ်။ ဟောပြောပွဲလုပ်မယ်။ လူထုစည်းရုံးရေးတွေ လုပ်မယ်ဆိုရင် စာဖတ်သူကြီး စိတ်ချမ်းမြေ့ပါ့မလား ဆိုတာလည်း အတွေးပွားမိပါတယ်။ ဒီစဉ်းစားချက်တွေဟာ နေထိုင်မှု မလုံခြုံခြင်း၊ ရှုထောင့်တစ်ခုတည်းကသာ သုံးသပ်ကြည့်ခြင်း ဖြစ်ပါတယ်။ တခြား အာဏာ လက်လွှတ်ရမှု၊ ကိုယ်ကျိုးစီးပွား ယုတ်လျော့မှု ဆိုင်ရာတွေပါ ထည့်စဉ်းစားရင် လက်ရှိ အာဏာပိုင်တွေဟာ အာဏာကို ဘယ်လိုမှ လက်လွှတ်ခံမှာ မဟုတ်ပါဘူး။
ဒါကြောင့်လည်း အာဏာတည်မြဲ၊ ပိုနေမြဲ၊ ကျားနေမြဲ အနေအထားလေး ပျက်မသွားအောင် နည်းလမ်းမျိုးစုံနဲ့ အခုအခံတွေ လုပ်နေတာပဲ ဖြစ်ပါတယ်။ “ပြည်သူ့အသံ၊ လွှတ်တော်အသံ” ဆိုပြီး ကမ္ဘာသိ ကြွေးကြော် တယ်။ ပြည်သူ့အသံ အစစ်ဖြစ်တဲ့ ၄၃၆ ပြင်ဆင်ရေး ထောက်ခံ လက်မှတ်ရေးထိုးထားတဲ့ ပြည်သူစစ်စစ် ငါးသန်းကျော်ရဲ့ လက်မှတ်တွေဟာ လွှတ်တော်အတွင်း ဖွဲ့စည်းထားတဲ့ အခြေခံ ဥပဒေပြင်ဆင်ရေး ကော်မရှင် အပေါ် ဘယ်လို သက်ရောက်မှုမှ မရှိဘူးလို့ လွှတ်တော် ဥက္ကဋ္ဌ သူရဦးရွှေမန်းက ယတိပြတ်ပြောဆို တယ်။ ပြီးတော့မှ လက်မှတ်ငါးသန်းဟာ အကျိုးတစ်စုံတစ်ရာတော့ ရှိပါတယ် ဆိုပြီး ပြောဆိုပြန်ပါတယ်။ ဘယ်လို နားလည်ရမှန်း မသိအောင် ဝေ့လည်ကြောင်ပတ် ပြောဆိုမှုသာ ဖြစ်တယ်လို့ နိုင်ငံရေး ရပ်ဝန်းက ဝေဖန်သံတွေ ညံထွက်လာတယ်။
ပြီးတော့တစ်ဖန် အာဏာကို ကျားကန်ဖို့ PR ဆိုတဲ့ ရွေးကောက်ပွဲ စနစ်ကို တင်သွင်းလာ တယ်။ ရွေးကောက်ပွဲ ကော်မရှင်ဥက္ကဋ္ဌ ဦးတင်အေးကိုယ်တိုင် ၂၀၁၃ တုန်းက ၂၀၁၃ မကုန်ခင်မှ PR ကို မပြဋ္ဌာန်းရင် ၂၀၁၅ အတွက် အချိန်မမီတော့လို့ PR ကို မသုံးဖြစ်တော့ပါဘူးလို့ အတိအလင်း ပြောဆိုခဲ့ဖူးပါတယ်။ ၂၀၁၅ ရွေးကောက်ပွဲ နီးလာလေလေ ရှုံးမှာကို ကြောက်ဖျား ဖျားလာလေ ဖြစ်နေတဲ့ ကြံ့ခိုင်ရေး ပါတီဘက်က မားမားမတ်မတ်ရပ်ပြီး အရင်က ပြောခဲ့တဲ့ စကားကို အတိတ်မေ့သလို၊ ရွှေပျောက်သလိုလို လုပ်ပြီး ကြံ့ခိုင်ရေး ပါတီဝင်ဟောင်း ကော်မရှင် ဥက္ကဋ္ဌကြီးဟာ PR ကို ကန့်ကွက်စကား မပြောတော့ဘဲ မသိလိုက် မသိဘာသာ နေနေတော့တယ်။
နောက်ဆုံး Plan ဖြစ်ပုံရတဲ့ စစ်တပ် အာဏာသိမ်းဖို့အတွက် လုံလောက်တဲ့ အကြောင်းပြချက်ကောင်းဖြစ်တဲ့ ဘာသာရေးဆန်တဲ့ အဓိကရုဏ်း မီးတွေကိုလည်း မသေအောင် မီးမွေး ထားတာဟာလည်း သံသယဖြစ်ဖွယ် ကောင်းတဲ့ ရက်စက် ယုတ်မာမှုကြီးပဲ ဖြစ်ပါတယ်။ ဘာသာရေးဆန်တဲ့ လူမျိုးရေး အဓိကရုဏ်းတွေ ဖန်တီးတဲ့ နောက်ကွယ်က ကြိုးကိုင်သူတွေကို ဖော်ထုတ်ရမယ်ဆိုတဲ့ သမ္မတရဲ့ စကားကိုလည်း ပြည်သူတွေကြားမှာ ယုံမှား သံသယနဲ့ တီးတိုးပြက်ရယ် ပြုနေကြတော့တယ်။
လက်ရှိ မြန်မာ့နိုင်ငံရေး အကျပ်အတည်းအတွက် ထွက်ပေါက် တစ်ခုဖြစ်တဲ့ တွေ့ဆုံ ညှိနှိုင်းဆွေးနွေးပွဲ (Table Talk) ကို အတိုက်အခံ ခေါင်းဆောင် ဒေါ်အောင်ဆန်းစုကြည်က တောင်းဆိုပါတယ်။ ကာချုပ် မင်းအောင်လှိုင်၊ လွှတ်တော်ဥက္ကဋ္ဌ သူရဦးရွှေမန်း၊ သမ္မတ ဦးသိန်းစိန်နဲ့ ဒေါ်အောင်ဆန်းစုကြည်တို့ လေးပွင့် ဆိုင် တွေ့ဆုံ ဆွေးနွေးရေးကို ဒေါ်အောင်ဆန်းစုကြည်က တောင်းဆိုခဲ့တာပါ။ ကာချုပ်နဲ့ သမ္မတက ကမ်းလှမ်းချက်ကို မဖြစ်နိုင်တဲ့သဘော တုံ့ပြန်ခဲ့တယ်။ ဒေါ်အောင်ဆန်းစုကြည် တောင်းဆိုတဲ့ လေးပွင့် ဆိုင် တွေ့ဆုံ ဆွေးနွေးမှုကို လက်သင့်မခံပေမယ့် ကာ/လုံ အစည်းအဝေးမျိုးမှာ ကာချုပ်၊ သမ္မတနဲ့ လွှတ်တော် ဥက္ကဋ္ဌတို့ သုံးပွင့်ဟာ မကြာခဏ တွေ့ဆုံမှုတွေ ရှိနိုင်တယ်လို့ နိုင်ငံရေးရပ်ဝန်းက သုံးသပ်ပါတယ်။ အဲဒီသုံးပွင့်ဟာ ယခင် အာဏာရှင်ခေတ်မှာ တစ်စိတ် တစ်ဝမ်းတည်း လက်တွဲညီစွာ အလုပ်လုပ်ကိုင်ဖူးသူတွေ ဖြစ်တာကြောင့် အလွတ်သဘော တွေ့ဆုံ ဆွေးနွေးမှုများလည်း ရှိနိုင်တယ်လို့ သုံးသပ်ရပါတယ်။ ဒါကြောင့် ဒေါ်အောင်ဆန်း စုကြည်အနေနဲ့ ကာချုပ်၊ လွှတ်တော်ဥက္ကဋ္ဌ၊ သမ္မတသုံးဦးပေါင်းကို တစ်ပွင့်လို့သာ သတ်မှတ်ပြီး တွေ့ဆုံ ဆွေးနွေးမှု ကို ကမ်းလှမ်းသင့်ပါတယ်။
ပြီးတော့ ဒေါ်အောင်ဆန်းစုကြည် တစ်ဦးတည်း တစ်ပွင့်လို့ သတ်မှတ်ချက်ဟာ နိုင်ငံရဲ့တခြားသော Stakeholder များ ဘက်က စဉ်းစားရင် သူတို့ကို ကိုယ်စားပြုမှု မရှိဘူးလို့ သံသယ ၀င်လာနိုင်စရာ ရှိပါတယ်။ လက်ရှိ အာဏာပိုင်များ အားလုံးကို ကိုယ်စားပြုမှု တစ်ပွင့်၊ အတိုက်အခံနဲ့ တိုင်းရင်းသား ပါတီများကို ကိုယ်စားပြု ဦးဆောင်တဲ့ ဒေါ်အောင်ဆန်းစုကြည် တစ်ပွင့်၊ လက်နက်ကိုင် တိုင်းရင်းသားများကို ကိုယ်စားပြု တစ်ပွင့်၊ လူထုအခြေပြု အဖွဲ့အစည်းများ အားလုံးကို ကိုယ်စားပြုမှု တစ်ပွင့်ဆိုပြီး လေးပွင့်ဆိုင် တွေ့ဆုံ ဆွေးနွေးမှု တောင်း ဆိုခြင်းက ပိုသင့်မြတ် လျော်ကန်မယ်လို့ သုံးသပ်ရပါတယ်။ အခက်အခဲ တစ်ရပ်ရှိလာမှာက အတိုက်အခံ ဒီမိုကရက်နဲ့ တိုင်းရင်းသားပါတီ အားလုံးကို ဒေါ်အောင်ဆန်းစုကြည် အနေနဲ့ ကိုယ်စားပြုနိုင် စွမ်းရည်ပဲ ဖြစ်ပါတယ်။ အတိုက်အခံ ညီညွတ်ရေး တပ်ပေါင်းစုဖွဲ့ရေးကို ဒေါ်အောင်ဆန်းစုကြည်အနေနဲ့ အထူးဂရုပြု အားထုတ်သင့်ပါတယ်။ ဒီလုပ်ငန်းစဉ်ဟာ အထူးခက်ခဲမှာ ဖြစ်ပေမယ့် အတိုက်အခံ ညီညွတ်မှု ကသာ အာဏာရှင်စနစ်ကို တွန်းလှန်ဖို့ တစ်ခုတည်းသော နည်းလမ်းဖြစ်ပါတယ်။ လူထုအခြေပြု အဖွဲ့အစည်း တွေကို ကိုယ်စားပြုမယ့် ခေါင်းဆောင်ကောင်း တစ်ယောက်လည်း မြန်မာပြည်မှာ လိုအပ်နေပါ သေးတယ်။ လက်ရှိအချိန်မှာ လက်နက်ကိုင် တိုင်းရင်းသားများ ကိုယ်စားပြု တစ်ပွင့်ဟာ မခက်ခဲတော့သလို လက်ရှိ အာဏာပိုင်များ ကိုယ်စားပြုမှုကတော့ ညီညွတ်မှုရှိကြတဲ့အတွက် တစ်ပွင့်ဖြစ်ဖို့ မခဲယဉ်းပါဘူး။
မြန်မာပြည် လက်ရှိအနေအထား အရတော့ အာဏာပိုင်များ ညီညွတ်မှုက အားအကောင်းဆုံး ဖြစ်နေပါတယ်။ စစ်တပ်ဟာလည်း အားအကောင်းဆုံး အင်စတီကျူးရှင်းအဖြစ် ခိုင်ခိုင်မာမာ ရပ်တည်နေပါတယ်။
အတိုက်အခံ ညီညွတ်ရေး အားမကောင်း၊ တွေ့ဆုံဆွေးနွေးရေး လမ်းကြောင်း အထမမြောက်ခဲ့ဘူး ဆိုရင်တော့ ပြည်သူ့အားကိုယူပြီး တိုက်ပွဲဝင်ရမယ့် (Street Politics) လမ်းပေါ် နိုင်ငံရေး အားကောင်း မောင်းသန် ရှင်သန် လာနိုင်ပြီး မြန်မာ့နိုင်ငံရေး အနာဂတ်ဟာ မှန်းဆရခက်ခဲတဲ့ အနေအထား တစ်ရပ်အတွင်း ကျရောက် သွားနိုင် ကြောင်း သုံးသပ်မိပါတယ်။
မြန်မာသံတော်ဆင့်သတင်းဌာန -