မြန်မာ့ဆက်သွယ်ရေးလုပ်ငန်း (MPT)ကို အမေရိကန် အခြေစိုက် ကုမ္ပဏီတစ်ခု ဖြစ်သည့် I.I (WS) Limited ၏ ဒါရိုက်တာ ဘုတ်အဖွဲ့ဝင်နှင့် ဌာနေ ကိုယ်စားလှယ်ဖြစ်သူ ဒေါက်တာမြတ်နုခိုင်က ၁၉၉၉ ခုနှစ်တွင် ချုပ်ဆို ခဲ့သည့် ကတိပဋိညာဉ် စာချုပ်ပါ စည်းကမ်းများကို ဖောက်ဖျက်၍ ၎င်းအနေဖြင့် နစ်နာ ဆုံးရှုံးမှုများ ရှိသည့်အတွက် MPT ကို တရားစွဲဆိုမည့်ကိစ္စနှင့် ပတ်သက်၍ သတင်းစာ ရှင်းလင်းပွဲ ပြုလုပ်ရန် ခန်းမ ငှားရမ်းရာတွင် သက်ဆိုင်ရာ အာဏာပိုင်များသို့ ခွင့်ပြုမိန့် တင်ပြီးမှသာ ငှားရမ်းခွင့် ပြုမည်ဟု ခန်းမ တာဝန်ခံများက ပြောဆိုကြောင်း I.I (WS) Limited ဒါရိုက်တာဘုတ်အဖွဲ့၏ ပြောရေးဆိုခွင့်ရှိသူ ဦးတင်အေးက သြဂုတ် ၁၁ ရက်တွင် မြန်မာ သံတော်ဆင့်သို့ ပြောသည်။
မြန်မာ့ဆက်သွယ်ရေး လုပ်ငန်းနှင့် West SAMOA အခြေစိုက် I.I (WS) Limited တို့သည် ဖိလစ်ပိုင်နိုင်ငံမှ အိန္ဒိယနိုင်ငံသို့ တယ်လီဖုန်း ဆက်သွယ်မှုများကို မြန်မာနိုင်ငံက ငှားရမ်းထားသော ဂြိုဟ်တု ထရန်စပွန်ဒါကို အသုံးပြု၍ ဆက်သွယ်ပေးပို့ရန် ၁၉၉၉ ခုနှစ်တွင် သဘောတူညီချက် စာချုပ်တွင် လက်မှတ်ရေးထိုး ခဲ့သော်လည်း MPT က လုပ်ငန်း ဆောင်ရွက်ရန် ပျက်ကွက်ခဲ့သည့်အတွက် တရားစွဲဆိုရခြင်း ဖြစ်သည်ဟု ၎င်းက ထပ်မံပြောကြားခဲ့သည်။
““သက်ဆိုင်ရာ မြို့နယ်ရုံးတွေမှာ ခွင့်ပြုချက်ရမှ ငှားမယ်ဆိုပြီး သက်ဆိုင်ရာ ခန်းမငှားတဲ့သူတွေက ပြောတယ်။ သတင်းစာ ရှင်းလင်းပွဲတွေ အများစု လုပ်နေတဲ့ တော်ဝင်နှင်းဆီက ပြောတာပေါ့။ MJN က ကျတော့ ပွဲတစ်ပွဲကို ခေါင်းစဉ် တစ်ခုအောက်မှာပဲ လုပ်ရမှာလို့ ပြောတယ်။ MPT ကို တရားစွဲဖို့ notice ပေးထားတဲ့ ရှေ့နေကလည်း နိုင်ငံရေး ပါတီတစ်ခုက ဖြစ်နေတော့ သူ့ပါတီကိစ္စတွေ ပြောဖို့ဆိုဖို့ရှိတော့ ခေါင်းစဉ် ၂ ခု ၃ ခုနဲ့ ပွဲလုပ်လို့ မရဘူးလို့ ပြောတာပေါ့။ ဒီပွဲကိုတော့ မြန်မြန် ဖြစ်စေချင်တယ်။ တိုင်းပြည်နဲ့ လူမျိုးအတွက် တကယ့် အဖြစ်အပျက် တစ်ခုကို မီဒီယာကနေတစ်ဆင့် ချပြချင်တယ်။ ပြန်လည် တင်ပြလို့ရတဲ့ အချိန်မှာ မီဒီယာကနေ တစ်ဆင့် ချပြချင်တယ်””ဟု I.I (WS) Limited ဒါရိုက်တာဘုတ်အဖွဲ့၏ ပြောရေးဆိုခွင့်ရှိသူ ဦးတင်အေးက ပြောသည်။
မြန်မာ့ဆက်သွယ်ရေး လုပ်ငန်းကို တရားစွဲရန် သတိပေး အကြောင်းကြားစာ (နို့တစ်) ပေးသည့် တရား လွှတ်တော်ရှေ့နေ ဦးအေးမြင့်(လမ်းပြကြယ်)က““MPT ကို တရားစွဲရမှာ ဖြစ်တဲ့အတွက် ခန်းမငှားရမ်း သူတွေက သက်ဆိုင်ရာကို ကြိုတင်ခွင့်ပြုမိန့် တောင်းပါ ဆိုတဲ့ ဥပဒေကို ကိုင်လာတယ်””ဟု ပြောသည်။
မြန်မာ့ဆက်သွယ်ရေး လုပ်ငန်းသို့ ပထမအကြိမ် သတိပေး အကြောင်းကြားစာ (နို့တစ်)ကို မေလတွင် ပေးပို့ခဲ့ပြီး ဒုတိယအကြိမ် နို့တစ်စာကို သြဂုတ် ၅ ရက်တွင် ပေးပို့ခဲ့ပြီးနောက် ၂ ပတ်ခန့် စောင့်ဆိုင်းမည်ဖြစ်ပြီး မြန်မာ့ဆက်သွယ်ရေးမှ အကြောင်းပြန်ခြင်း မရှိပါက မူလ အစီအစဉ်အတိုင်း တရားစွဲဆိုမည် ဖြစ်ကြောင်း I.I (WS) Limited ၏ ဒါရိုက်တာ ဘုတ်အဖွဲ့ဝင်နှင့် ဌာနေ ကိုယ်စားလှယ် ဖြစ်သူ ဒေါက်တာမြတ်နုခိုင်က မြန်မာ သံတော်ဆင့်သို့ ပြောသည်။
သဉ္ဇာဆွေ
မြန်မာသံတော်ဆင့်သတင်းဌာန